ꃅꎸꋋꂷ，ꌺꄿꅪꄿꊈꀋ，ꊋꇤꅊꇈ！

ꁱꊿ：ꐚꑕꒈꎆ

ꀘꊿ：ꐙꇐꑸꆀ

ꃅꎸꄮꐰꑟꇁꀐ，ꆍꊈꆹꇬꇁꉚꀕ？ꃅꑌꇗꂷꆹꊪꄉꀕ？ꃅꎸꋙꒉꃃꅍꆹꊌꀕ？ꇭꀧꆹꈍꃅꑌꐙꄏꐙꆜꇙꁱꋏꀋꄐꆹꀐꋭ，ꁱꂷꁰꁱꌋꆀꇇꀙꍸꀑꀞ？ꁱꂷꀗꀘꌋꆀꈌꃴꉐꃴꋩꀑꀞ？ꉌꂵꋍꃢꋍꃢꉪꃅꉪꇐꈤꄡꑟ，ꌷꐋꇢꊭꐯꏯꊋꊡꅉꃅꆹꄉꑴꀞ？ꌙꈈꀕꃅꂘꑳꇂꃴꄉꉌꂵꈐꏭꒉꌶꅉꂶꌠꒌꉪꅉꃅꐺꑴꀞ？ꎹꄓꆍꊈꀀꄖꌠꆹꃬꀮꉬꄡꀋꑟ，ꈧꌺꆪꌺꉬꄡꀋꑟ，ꆍꊇꉪꐨꉬꄡꑟ。

ꃅꎸꋋꂷ，ꆍꊇꆹꀋꆷꀋꃹ，ꆍꊇꆹꎭꅗꅧꅗ。ꊨꏦꉪꐨ、ꀿꃀꉘꇉꐩꇱꄓꀵꄉꌺꄿꀿꆹꇔ、ꅪꄿꃀꆹꇔꂿꄸꊋꇤꑭꁘꂴꐪꊂꀋꂿ，ꌺꆹꈄꀋꏾꂷꀋꐥ，ꅪꆹꎔꀋꏾꂷꀋꐥ。ꈍꑋꈎꂾ，ꉢꑌꐧꌷꀊꂥꌕꈎꊐꌠꎖꉚꃀꄳꏢꌠꉢꐂꇬꎭ，ꀃꑍꌌꇬꄉꌧꇁꇬꆏꀄꂼꂻꌠꌡ，ꋍꁁꏯꆏꊽꉌꐡ，ꋍꁁꏯꆏꀱꀊꋨꄮꉂ。ꀊꋨꄮꉢꉌꂵꌕꁏꒉꄩꅞ、ꌕꁏꒉꃴꃹ，ꋍꃢꋍꃢꁱꂷꉢꇬꀋꌧꐛꅹꉌꂅꑓꑣ，ꋍꃢꋍꃢꁱꂷꌶꅉꃅꄉꉌꐡꑓꐡꂘꑳꇂꃴꑌ，ꋍꃢꋍꃢꂘꃀꉙꅇꂘꅇꐊꄉꉌꂵꁨꐞꄑ。ꄚ，ꃰꊿꂷꇬꐥꇬꐥꐨꎭꅧꇵꂷꅧꇗꀕꑠꊭꐥꑲꆀꈻꇐꐥ，ꐥꐨꋌꊭꁮꅉꐛꅀꐩꋊꐛꄿꂿ，ꎺꇁꋌꊭꄀꄮꆏꉌꐡꌊꑓꁴꑓꇬꇉꉌꂵꒈꄟꀕ。ꉠꀁꑳꅫꃀꐧꌷꀊꂥꊐꌠꌷꈧꌠꀋ，ꃅꎸꋋꂷ，ꆍꊈꊋꇤꅊꇈ，ꎖꌊꉌꂵꉪꅉꊌꆹꅊꇈ！

ꉬꑴꇊ，ꊋꇤꑲꆀꊋꐛꇁ，ꉪꐨꐤꑲꆀꉘꇉꐩꐥ，ꈝꃀꋋꏢꉢꋍꃢꍬꋻꀐ，ꎖꋪꍈꐥꀑꐛꅹꈨꊰꀕꉠꅇꑇ。ꃅꎸꆹꎰꂚꃨꄮꐰ，ꃅꎸꆹꏬꆉꃰꄮꐰ，ꃅꎸꆹꌳꈄꒆꄮꐰ，ꍜꇰꀉꇐꉹꄵꁦꀑꉆꋻꄷ，ꂽꌋꇊꀕꇂꍐꃰꃅꄻꋻꄷ，ꇍꈩꌦꌺꇍꈩꀒꎂꑌꋻꄷ，ꆍꊇꈄꋊꈄꌺꒆꀕꆹꀋꐚ，ꃅꆳꀕꌙꇈꊷꆣꀕꄹꉈ，ꆍꊇꃅꇁꈄꅉꉜꉏꂿ，ꎔꇁꃨꅉꉜꉏꂿ。ꆍꊇꉌꂵꐛꌒꄿꂿꐛꀋꌒꄿꂿ，ꆍꊇꉌꂵꐞꄚꄿꂿꐞꀋꄚꄿꂿ，ꐧꌷꀊꂥꊐꌠꌕꈎꐥꐨꁮꅉꆹ，ꐞꄚꐝꀋꄚꃅꅇꇬꌐꂷꍈꁱꇬꄀꇬꑲꆀꍑꀐ，ꆏꈍꃅꄉꈢꋒꁧꂰꌠꃅꑍꃅꉖꎺꄅꂿꄸꆹꀋꐚ。

ꃅꎸꋋꂷ，ꆍꊇꊋꇤꅊꇈ！ꑊꑍꒊꆭꀕꃅꐥꐩꊝꄉꊋꇤ，ꌧꇐꆍꊇꋌꀋꌧꄮꇬꉌꂵꃬꄵꃅꄵꄡꑟ，ꎖꌊꉾꅀꀋꉾꃅꑠꉪꌊꀋꌸ，ꊋꇤꑲꆏꍑꀐ，ꉌꆐꀋꅑꑲꆏꍑꀐ。ꀿꃀ、ꐋꀨꌋꆀꌷꐋꅽꏯꈐꊟꊋꊡꄮꇬꑊꑍꒊꆭꀕꃅꋀꊇꏯꅇꀱ。ꃶꐚꃅꇬꆹꃰꊿꂷꌤꆿꀉꑌꃅꋒꋻꑲꆀꅉꐚꑴꌧꇁ，ꆍꊇꌤꆿꈍꃅꆏꋌꎼꐬꆠꑠꊝ、ꈍꃅꉌꊰꑠꊝꇬꑌꀁꑽꀋꐥꄷꉉꊿꆍꊇꉈꇬꑓꇬꈧꌠꇰ。ꆍꊇꇵꂷꌌꆍꊇꐥꐨꀺ，ꆍꊇꉂꏣꌌꆍꊇꌒꈜꀺ，ꌤꆿꑞꋒꅉꂿꈌꄡꊰꉌꄡꊰ，ꉌꂵꇬꀘ，ꉌꊈꒉꈤꇓꂵꌡ。ꎺꄉ，ꑓꁵꋍꈨꋋꈨꆹꊨꏦꀉꄂꅐ，ꇵꂷꋍꈨꋋꈨꆹꊨꏦꀉꄂꅐ，ꈝꃀꋍꈨꋋꈨꆹꊨꏦꀉꄂꍬ，ꊨꏦꀱꊨꏦꊋꊡꄉꊋꇤ。

ꀋꍣꀋꁻꒉꀋꈭ，ꀋꊭꀋꄐꌉꀋꈿ。ꄯꁯꀋꌌꃅꄉꈍꃅꒉꈫꂯ？ꉊꈯꀋꌌꃅꄉꈍꃅꏜꒇꂯ？ꃤꃀꀋꌌꃅꄉꈍꃅꌩꋲꂯ？“ꌉꈿ”ꄮꇬꊭꋒꄏꋒꃅꆹꅊꇈ，ꑟꑌꄡꐒꄡꊀ，ꉌꂵꇬꄡꊸ，ꑭꁘꇬꄡꊸ。ꈍꃅꑌꃅꑍꆍꊇ“ꌉꈿ”ꌕꑍꌠꃅꊸꅪꌬꀕ，ꃅꑆꃴꂿꀕ，ꃅꆳꆲꌙꀕꄡꑟ。ꃅꎸꄮꐰꋋꂷ，ꌺꄿꅪꄿꊈꉌꂵꁦꀑꉪ，ꐰꇑꁦꀑꑟꅊꇈ。ꌩꆹꀑꉀꒆ，ꒉꆹꀁꋌꒉ。ꋧꃅꇣꄧꐧꇁꃰꊿꂓꅑꂓꈨꀋꏾꂷꀋꐥ，ꄚꈝꐯꃅꂓꅑꂓꈨꑟꀋꉬ。ꊫꂫꁤꇅꀕꌠꊂꆹꐺ，ꈝꃀꀉꎴꊂꆹꐺ，ꌺꄿꅪꄿꊈꀋꇇꈌꇙꄉꊼꇅꊋꍈꀋꇤꇂ，ꀉꇨꃅꎖꉚꍩꀋꂿꃅꌉꈾꋌꃢꒉꃴꉜꏂꀜꃅꀜꒉꄩꅐꇁ，ꅙꑭꎽꀮꊝꃅꊝꄟꅐ，ꐰꇑꑌꉆꅉꉆ，ꈐꉘꑌꑋꅉꑌ，ꊂꌒꑌꀀꅉꀀ。

ꃅꎸꋋꂷ，ꌺꎔꌺꃨꌳꈄꌺꄿꊈꀋ，ꅪꎔꅩꃨꅪꈄꅪꄿꊈꀋ，ꊋꇤꅊꇈ！ꊋꐛꅊꇈ！